Giardia-infeksjon i 2004 - redusert livskvalitet ti år seinare

I 2004 vart drikkevatnet til store delar av Bergen sentrum forureina av parasitten Giardia lamblia. Dette utbrotet var eit av dei største i sitt slag i Europa, og kanskje så mange som 5000 personar var akutt sjuke med mageinfeksjon. Av desse fekk 1252 pasientar påvist Giardia-parasitten i avføringsprøvar. Tidlegare har ein funne at irritabel tarmsyndrom og kronisk utmatting var vanlegare hjå desse i opptil ti år, samanlikna med ei kontrollgruppe som ikkje var smitta.

Sverre Litleskare og medarbeidarar ved NORCE Resesearch og UiB har no undersøkt korleis Giardia-smitte i 2004 påverkar livskvaliteten ti år seinare.

Livskvaliteten til Giardia-smitta var noko lågare enn for kontrollgruppa. Tapet i livskvalitet var sterkt knytt til samtidig utvikling av plager sams med irritabel tarmsyndrom og spesielt kronisk utmatting. Dersom ein ikkje hadde nokon av desse plagene var det ikkje forskjell i livskvalitet mellom dei Giardia-smitta og dei friske kontrollane.